نور · مهندسة معمارية ومستشارة تنسيق بيوت

«البيت إلي هو الراحة والأمان.»

صورة شخصية ترويجية لنور، معدّلة من صورتها الأصلية
مهندسة معمارية · جامعة الاتحاد ٢٠١٤ · دورات في التصميم الداخلي والإظهار ثلاثي الأبعاد

وأنا صغيرة بحلب، كنت إذا شفت زاوية بالبيت متجمّعة فيها أغراض، ما أرتاح لحتى أرتّبها وأخلّيها فاضية. كنت حسّ البيت عم يتنفّس. ما كنت بعرف إنو هالإحساس رح يصير شغلي.

درست هندسة العمارة بجامعة الاتحاد وتخرّجت ٢٠١٤، وكنت شايفة حالي بمكتب، ومشاريع، وتصاميم ثري دي. بس الحرب سكّرت المكاتب، وسكّرت معها هالحلم لفترة.

بعدين إجيت على إسطنبول، وتركت ورايي بيت العيلة بحلب، البيت اللي كان يلمّنا كلنا. وهون تعلّمت حسبة جديدة: الشقق بتركيا بشكل عام صغيرة، وكل زاوية فيها إلها قيمة. أول ليلة، والأغراض بعدها بالكراتين، سألت حالي: كيف بدي خلّي هالمكان يحسّ إنو بيت؟

وعملته. سكنّا بخمس بيوت، وكل بيت إله تقطيعه وإله حكايته، وبكل مرة كنت أرجع أرتّب نفس العفش من جديد، لحتى يصير البيت يشبهنا. ومن هون تعلّمت أهم درس بشغلي: البيت الحلو ما بيبدأ من الشراء، بيبدأ من إنك تفهمي المساحة.

اللقاء اللي غيّر الطريق

وقتها كان التنسيق بالنسبة إلي شي بحبّه، مو شغل. لحتى تعرّفت على رضوى جلال، رائدة الأعمال اللي بنت من الصفر أكاديمية بتساعد آلاف الستات بالعالم العربي. بقعداتنا وحكينا، شافت فيّ شي ما كنت شايفته. قالتلي: «نور، اللي بتعمليه ببيتك، في ستات كتير بحاجته.»

رضوى صارت مرشدتي بالبزنس. منها تعلّمت إنو الموهبة لما تتحوّل لخدمة واضحة، بتغيّر حياة ناس، وإنو الست اللي بتساعد غيرها بتكبر معها. ومن هون انولدت نورابا هوم.

ليش بفهمكِ

درست التصميم الداخلي وبرامج الإظهار ثلاثي الأبعاد، وساعدت قرايبي وجيراني ببيوتهم، من توزيع الأثاث والإكسسوارات لاختيار ورق الجدران وتصميم الواجهة. وكل يوم بتوصلني رسائل من ستات متلي: أمهات، موظفات، تعبانات، بدهن بيت مريح قبل ما يكون مثالي. وأنا كأم لبنتين، بفهمهن تمامًا.

هلّق، كل مسا بقعد بالصالون، شمعة وضو خفيف، وبعرف إني وصلت. وبدي ساعدكِ توصلي لهالإحساس، ببيتكِ إنتِ، وبالموجود عندكِ.

فلسفتي

«ستايلي بثلاث كلمات: بسيط، عملي، ومريح. وما عندي قاعدة وحدة للبيت الحلو: البيت الحلو هو اللي صاحبته بترتاح فيه.»

«ما بحب نلحق كل ترند ونبني عليه أساس البيت. الترند بيتغيّر، وتغيير القطع الأساسية كل مرة مكلف. منختار الأساسيات حسب حاجتكِ وذوقكِ لتعيش معكِ سنين، والترند منضيفه بتفاصيل صغيرة سهلة التغيير.»

«وإسطنبول فتحت عيوني: ديكورات الكافيهات، صالات عرض الأثاث، وحتى زاوية بممر مول، كلها بتعطيني أفكار بجيبها لبيتكِ.»

احجزي استشارتكِ مع نور ↙